• machinthe

ကန္တာရဆင်

ပန်းခြံထဲမှာ ကန္တာရဆင်နှစ်ကောင် ထိုင်နေတယ်

မျက်စိကို အဖောက်ခံရတဲ့ မင်းသမီးလေးအလား ငိုကြွေးဖို့‌ နေနေသာသာ

မြင်နေတဲ့ မျက်လုံးတွေကို အဲ့ဒီဆင်တွေ ကန်းပစ်လိုက်ချင်ကြတယ်


တောင်ပိုင်းက တိမ်တွေက

ခရီးနယ်လွန်လာတဲ့ ဆင်တွေကို

ကုန်းအဆင်းမှာ ပြန်တွေ့တော့

သူတို့ရဲ့ အသားမာတက်နေတဲ့ ဖဝါးတွေကို အံ့ဩသင့်နေကြတယ်


ခဏဖြစ်ဖြစ်ပါပဲ

နေရောင်တွေ ထိန်နေတဲ့

တိုက်ခန်းကျဉ်း‌ထဲမှာ

ကမ္ဘာအသစ်တစ်ခု

ဆောက်ကြည့်ချင်တယ်


ဘာသာစကားတွေ ပြောတတ်နေဖို့

မလိုပါဘူး

ကြင်နာတတ်တဲ့ အကြည့်တွေနဲ့

နူးညံ့တဲ့ နှာမောင်းချင်း တိုးခွေ့မှုတွေပဲ ဆင်တွေ လိုအပ်တယ်


တိမ်တွေက သနားလို့

မိုးပါရွာချပေးရင်တော့

ကန္တာရဆင်တွေရဲ့

ခြောက်ကပ်နေတဲ့ အရေပြားတွေ

ခဏတာ စိုစွတ်ခွင့်ရတာပေါ့လေ


ဇွန် ၁၂၊ ၂၀၂၂

6 views0 comments